Minggu Paskah I 12 April 2020

IBADAH PASKAH I

PARNINGOTAN ARI HAHEHEON NI TUHAN JESUS

HURIA KRISTEN BATAK PROTESTAN

HKBP DISTRIK XVII INDONESIA BAGIAN TIMUR

EV. MATEUS 28 : 1 – 10                        EP. JOHANNES 11 : 25 – 27

TEMA :

“HUASO NI HAHEHEON NI JESUS”

Minggu, 12 April 2020

01. Joujou Marsomba Tu Debata           (U:Uluan,       R:Ruas)

 Covit 19 na so marujung dope. Tung pe masa songon i di hita saluhutna, dohononta ma sian las ni rohanta:

R:  Puji ma Jahowa, ale tondingku, jala nasa rohangku dibagasan mamuji goarNa na badia i. Puji ma Jahowa, ale tondingku, jala unang tung halupahon sude denggan ni basaNa.

U:  Tutu, pujionta ma goar ni Tuhanta i! Tutu, tung na so jadi lupa hita di denggan ni basaNa. Ai marhitehite dengganbasa ni Tuhan i do naung marsuru AnakNa, Jesus Kristus Tuhanta i tu portibi on. Pola mate Ibana di hau pinorsilang holan humophop hita pardosa. Marhitehite hamamateNa di hau pinorsilang i gabe malua ma hita sian gomgoman ni sibolis. Jala laos marhitehite di haheheonNa na tapestahon sadari on, taingot ma parsidohot ma hita dihamonangan i ima: hangoluan na manontong na pinarade ni Tuhan Jesus tu angka na porsea di Ibana!

R:  Nunga tarbondut hamatean; nunga soluk hamonangan. Jo hamatean, di dia hamonanganmi? Jo hamatean, di dia soropmi?

U:  Ido pos ni rohanta di Pesta Paskah sadari on molo tung pe di bagasta be hita rap dohot keluarga mamuji goar ni Tuhan i. Taingot ma: Monang do hita muse maralohon angka na masa on. Ai nunga monang Tuhan Jesus sian hamatean. Jala haporseaonta pe taluhonon ni Tuhan i do angka na masa on ai Ibana do na marhuaso di atas ni saluhutna asa boi hita muse rap mamuji goarNa dibagas joro i. Nunga talu dibahen Tuhan Jesus hamatean i. Nunga talu sorop ni sibolis i.

Alani, sian las ni rohanta tapuji, tapasangap ma goarNa sian BE, No. 96: 1, 3 “Nunga talu hamatean”

R   : (Mandendehon BE, No; 96: 1, 3 “Nunga talu hamatean”)

v  Nunga talu hamatean dibaen Tuhan Jesus i.

Ai na hehe do Ibana, songon na nidokNa i.

Reff: Haleluya, Haleluya, nunga hehe Jesus i.

Haleluya, Haleluya, nunga hehe Jesus i. (Jongjong)

v  Marlas roha be ma hita, ala hehe Jesus i.

Ai malua sude hita, songon na nidokNa i.

Reff: Haleluya, Haleluya, nunga hehe Jesus i.

Haleluya, Haleluya, nunga hehe Jesus i.

02. Votum – Introitus – Doa

U:  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Porbadia na manompa langit dohot tano on.

R:  Amen.

U:  Unang ho mabiar, Ahu do bonana dohot ujungna. Na mangolu do jala na mate do Ahu najolo, jala ida ma, Ahu do na mangolu ro di saleleng ni lelengna, jala di Ahu do anakhinsu ni banua toru dohot hamatean. Haleluya!

U,R: (Mangendehon): Haleluya – Haleluya – Haleluya

U:  Martangiang ma hita: Ale Tuhan Jesus, Tuhannami! Na mandok mauliate do hami tu ho, ala ditaluhon Ho do dosa dohot hamatean marhitehite hamamateM i, ala disondangi Ho tanomannami, asa marpanghirimon na mangolu hami ala ni haheheonMi. Ndang pola be hami mabiar mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong, pargogoi ma hami mamuji dohot mangoloi Ho ariari, pasangaphon Ho dibagasan haporseaon na mangolu, paima sahat hami tu lambungMu.

U,R: Amen! (hundul)

03. Marende, No. 90: 1 “Sai tapuji ma Tuhanta’

v  Sai tapuji ma Tuhanta, ale hajolmaon i.

Ai naung hehe do Tuhanta sian hamatean i.

Dipasidung Jesus i ulaonNa sasude.

Patupahon haluaon di saluhut hajolmaon.

04. Singkat Ni Patik: Rom 1: 16 – 17 

U:  Tatangihon ma singkat ni Patik ni Debata di Pesta Parjolo Parningotan Ari Haheheon ni Tuhan Jesus, ima na tarsurat di Rom 1: 16 – 17. Songon on ma didok disi:

Ai ndang na huhailahon barita na uli i, ai hagogoon ni Debata do i paluahon nasa na porsea, halak Jahudi jumolo, dung i dohot do halak Junani.

R:  Ai dipapatar do disi hatigoran ni Debata, na sian haporseaon tu haporseaon, hombar tu na tarsurat hian: "Na mangolu do partigor i hinorhon ni haporseaonna!"

U:  Ido sahatna. Antong, rap mangido ma hita sian Tuhan Debata laho mangulahon na hombar tu hataNa i.

U,R: Ale Tuhan Debata, sai pargogoi ma hami mangulahon na hombar tu hataMi. Amen.

05. Marende BE, 94: 3 “Ale tondingku naung hehe”

v Tahaburjuon mangalo dosanta,

jala tabaen Tuhan Jesus donganta.

Pos ma rohanta di Tuhanta i.

PamonangonNa do hita sude, pamonangonNa do hita sude.

(jongjong)

06. Tangiang Manopoti Dosa

U:  Tatopoti ma dosanta na godang i tu adopan ni Debata, tapaunduk be ma rohanta, martangiang ma hita: Ale Tuhan Debata, Pargogo na so hatudosan jala Amanami! Hujou hami do goarMu  na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami! Asi ma roham di hamim, sai patongtong ma di hami roha hamauliateon tu Ho. O Tondi Porbadia, pangapul di na marsak roha, pamalum ma saluhut na bernit, binahen ni dosanami! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak dohot Tondi Porbadia. Amen!

      Tabege ma baga-baga ni Debata, taringot tu hasesaan ni dosanta: “Molo tung adong manang ise na mardosa, adong do pangondianta di Ama I, ima Tuhan Jesus Kristus na tigor roha i. Jala Ibana do pardengganan taringot tu dosanta, alai ndada holan taringot tu dosanta, dohot do taringot tu dosa ni saluhut portibi on.” Hasangapon ma di Debata di ginjang!

U+R: Amen.        (hundul)

07. Marende BE, No. 633: 5 “Nunga hehe Kristus i”

v   Sangap ma di Tuhan i, Haleluya;

puji ma goarNa i, Haleluya!

Baen hamonanganNa i, Haleluya!

manondangi ngolumi, Haleluya!

08. Epistel: Johannes 11: 25 – 27 

U:  Hata ni Debata turpuk Epistel di Pesta Parjolo Parningotan Haheheon ni Tuhan Jesus sadari on, ima na tarsurat di Johannes 11: 25 – 27 . Songon on ma tarsurat disi: Dung i ninna Jesus ma mandok ibana: Ahu do haheheon dohot hangoluan; na mangolu do na porsea di Ahu, nang pe mate ibana!

R:  Jala ganup na mangolu jala na porsea di Ahu, na so tupa mate ibana salelenglelengna! Porsea do ho disi?

U:  Dung i didok ma tu Ibana: Olo, Tuhan, na porsea do ahu: Ho do Kristus, Anak ni Debata, na naeng ro tu portibi on.

Ima sahat na! Martua do angka na tumangihon hata ni Debata jala na umpeopsa!

U,R: Amen!

09. Marende BE, No. 632: 1 “Nunga hehe Kristus”

v  Nunga hehe Kristus, marsihohot ma hamu.

Lam sumurung hita diulaon ni Tuhanta.

Lam sumurung hita diulaon ni Tuhanta.

Radot ma hita lao mangula tu Tuhanta.

Radot ma hita lao mangula tu Tuhanta. Amen!

10. Manghatindangkon Haporseaon

U:  Tahatindangkon ma hata haporseaonta i, rap dohot donganta sahaporseaon di sandok portibi on, rap ma hita mandok:

U,R:  Ahu porsea di Debata Jahowa, i do Ama, Pargogo na so hatudosan na tumompa langit dohot tano.

Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, AmaNa i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.(hundul)    

11. Marende BE, 93: 2 “Pesta Paskah hatuaon”                          

v Talu ho banua toru ndang tarbaen tioponmu

Raja Siparngolu i, Raja Siparngolu i.

Hamatean, hamagoan na so pola habiaran, nunga talu i sude.

12. Jamita: Mateus 28 : 1 – 10

13. Marende BE, No. 627: 1, 2 “Jesus naung hehe” + Papungu Pelean

v  Jesus naung hehe, Haleluya! Puji endehon, Haleluya!

Hamonangan ni Tuhanta i na manaluhon sibolis i.

Reff: Las ma roham puji ma Tuhan i, ala naung talu hamatean i.

Sesa dosanta, Haleluya; mangolu Jesus, Haleluya!

v  Di ari patoluhon i maloha do tanomanNa i.

Jesus Raja hangoluan i, na patundukhon sibolis i.

Reff: Las ma roham puji ma Tuhan i, ala naung talu hamatean i.

Sesa dosanta, Haleluya; mangolu Jesus, Haleluya!

14. Tangiang Pelean + Tangiang Paskah + Ale Amanami + Pasupasu

P: Tatangianghon ma peleanta :

Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus.

Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on.

Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

R: (mangendehon) Nasa na nilehonMi, tondi ro di pamatangku,

hosa dohot gogongki, ro di saluhut artangku,

hupasahat i tu Ho, na so unsatonku do.

P: Ale Tuhan Debata, Amanami, jala Parasiroha! Mauliate ma rohanami jala pujionnami Ho, ala naung ditubuhon Ho hami paduahalihon sian godang ni asi ni rohaM tu panghirimon na mangolu marhitehite haheheon ni Tuhan Jesus Kristus sian na mate. Nunga gabe Sipalua jala Sipangolu AnakMi di hami, jala Ibana Tuhannami, Ibana Ulunami, siihuthononnami. Na marlas ni roha do hami nuaeng marningot haheheonNa i. Nunga talu si bolis i, talu hamatean, ai nunga monang Tuhannami. Ulubalang na gogo i. Ibana do manogihon hami sian hamatean tu haheheon sogot. Ala ni i umbahen hupangido hami: Sai asi ma rohaM, patogu ma haporseaonnami maniop Barita na Uli i, asa unang ganggu rohanami di na hubolus hami hamatean i. sai sungguli ma rohanami dohot roha ni dongannami, asa rap hehe hami sian parrohaon na buruk i; asa tarulahon hami parange na imbaru.

     Sai pasupasu ma HuriaM dohot Parbarita na uli, na mamaritahon haheheon ni Tuhannami, asa lam tarsunggul angka na pedem roha jala hehe sian dosana be. Sai papos ma rohanami manghaporseai, naung mardame jala mardomu hami tu Ho ala ni pardengganan na pinatupa ni AnakMu. Sai pasabam jala pamalum ma rohanami. Tompa ma roha na ias dohot tondi na marsihohot di bagasan hami, asa tarhajongjongkon hami, naung pintor hami ala ni hatigoran na pinatupa ni Tuhan Jesus Kristus. Sai sungguli ma panghirimon na mangolu di hami, asa tarapul rohanami marningot angka dongannami naung jumolo nialapMi, jala asa tarapul rohanami manaon sitaonon di hasiangan on. Sai apuli angka na matean, na dangol, na pogos, na so marina, angka na mabalu dohot angka na malungun tu banua ginjang marhitehite haheheon ni Tuhan Jesus Kristus, Tuhannami.

Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R:    (mangendehon) Ai Ho do nampuna harajaon dohot hagogoon ro di hasangapon saleleng ni leleng. Amen !

P: Dipasupasu jala diramoti Tuhan Debata ma ho (hita)!

Disondangkon Tuhan Debata ma bohiNa tu ho (hita) jala asi ma rohaNa mida ho (hita)!

Didompakhon Tuhan Debata ma bohiNa tu ho (hita) jala dipasaorhon ma dameNa tu tondim (tondinta). Amen.

P+R: (Mangendehon) Amen…Amen…Amen!