Minggu Quasimodogeniti,19 April 2020

PARTORDING NI PARMINGGUON 

DI MINGGU QUASIMODOGENITI

(1 Petrus 2 : 2)

Ev: Psalmen 42 : 1 – 6                                       Ep: 1 Petrus 2 : 1 – 5  

TOPIK:

MAUAS DO TONDINGKU TU DEBATA

HURIA KRISTEN BATAK PROTESTAN

19   APRIL 2020

I.      PARHOBASON:

1.       Partangiangan on ni uluhon ni Ama manang Ina.

2.       Diaturhon ma na mamboanhon tangiang pangondianan

3.       Diparade hian ma inganan ni pelean.

II.      PARMINGGUON:

1.        PAMUHAI:

U   :  On ma ari paualuhon di hita dung hehe Kristus sian na mate. Di goari do minggunta on Quasimodogeniti (Songon posoposo na imbaru tubu, 1 Pet. 2: 2). Antong, hita angka naung tinobus ni Tuhanta, ro ma hita tu adopanNa songon posoposo na imbaru tubu, na sai uasan di susu na tama, na sai uasan di Hata ni Debata, marsomba huhut tungki, manghalashon denggan ni basaNa, naung manghamonanghon hita marhite haheheonNa, mandok:

R   :  Tuhanhu jala Debatangku! Mauas do tondingku ro tu adopanMu.

U   :  Jadi didok Jesus ma tu ibana: Ala diida ho Ahu, umbahen na gabe porsea ho. Martua ma angka na porsea, atik pe so diida!

R   :  Tuhanhu jala Debatangku! Porsea do hami nangpe so huida hami.

U   :  Antong beta ma hita marsomba laho mamuji dohot pasangaphon Tuhanta. Ro ma hita angka na mauas di asi ni roha ni Debata. Marende ma hita:

2.        Marende BE No. 3: 1,3  “Puji Jahowa Ale Tondingku”

v  Puji Jahowa ale tondingku, puji Ibana Debatami.

Tagan so suda dope bohalhu, naeng pujionku basaNa i.

Sitompa daging, tondi pe ingkon dipuji sasude. Haleluya, Haleluya

v  Martua halak na niondingan ni Debatanta Jahowa i.

Angka na hot marhaporseaon, di Jesus Kristus Tuhanta i.

Molo Debata donganmu, ndang adong hurang tuamu. Haleluya, Haleluya.

3.        VOTUM – introitus – tangiang:

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. (Parhalado partohonan).

U   :  Hisapan ma hamu songon posoposo na imbaru tubu i, disusu na denggan na so mangansi asa lam ganda hamu marhite sian i molo tung nunga didai hamu basar ni Tuhan i. Puji hamu ma Debata hagogoonta i, olophon hamu ma Debata ni si Jakob. Haleluya!

R   :  (Mangendehon): Haleluya, Haleluya, Haleluya!

U   :  Martangiang ma hita:  Ale Tuhan Debata! Suru ma Tondi Parbadia tu rohanami, asa tarapul situtu rohanami marhitehite haheheon ni anakMu, Tuhan Jesus Kristus, jala asa  lam ganda haporseaonnami marhitehite pangkirimon na mangolu, asa tongtong huingot hami, na hehe do hami muse sian na mate songon Tuhan Jesus Kristus, Tuhannami, naung hehe sian na mate i. Amen.

4.        Marende BE No. 557 : 1 – 2  “Dao Dumenggan”

v  Dao dumenggan, asi ni rohaM, dao umarga sian ngolungkon.

Sai pujionhu ma Ho Tuhanhu, dao umarga asi ni rohaM.

v  Ala goarMu ro do au tu Ho, herbang tanganhu lao mamuji Ho.

Dao umarga sian ngolungku, dao dumenggan asi ni rohaM.

5.        Patik: 

U   :  Patik ni Debata sihangoluhonta di minggu Quasimodogeniti sadari on dienaet sian 1 Korint 15: 57 – 58. Alai mauliate ma di Debata, na pamonang hita marhitehite Tuhanta Jesus Kristus. Onpe, hamu angka donganhu na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i.

          Antong rap mangido gogo ma hita sian Tuhan Debata.

R   :  Ale Tuhan Debata, sai pargogoi ma hami mangulahon na hombar tu PatikMi. Amen.

6.        Marende BE No. 179: 1 – 2  “Adong Do Sada Mual I”

v  Adong do sada mual i, di na mardosa i,

mansai denggan do mual i, pasonang rohangki.

v  Aek mual na badia i, i ma di Jesus i.

Disesa do tihasta i, dibuat arsak i.

7.        TANGIANG pangidoan dohot BAGABAGA NI DEBATA:

U   :  Ale Tuhan Debata, Amanami jala Parasiroha! Debata na patubuhon hami paduahalihon tu panghirimon na mangolu marhitehite haheheon ni Tuhan Jesus Kristus sian na mate. Songon posoposo na uasan di susu na tama, ro do hami tu adopanMu mangido asi ni rohaM dohot hasesaan ni dosanami,

R   :  Tuhanhu jala Debatangku, asi ma rohaM di hami.

U   :  Diloas Ho do nuaeng hasusaan masa tu hami ala ni sorimago Covid-19 jala na holsoan do hami ala hurang denggan jala hurang godang parbue ni na huula hami martimbangkon nasailaon. Songon posoposo na uasan di susu na tama marpungu hami nuaeng tu joloM: huundukhon hami ro tu toru ni tanganMu na gogo i. Sai pasupasu ma sipanganon na otik i, asa gabe sipargogo tu dagingnami. Sai lehon di hami hangoluan siganup ari, jala palua ma hami sian hagogotan angka na hurangan i, 

R   :  Tuhanhu jala Debatangku, asi ma rohaM di hami.

U   :  Diloas Ho do nuaeng hasusaan masa tu hami ala ni sorimago Covid-19 jala na holsoan do hami marningot angka dongannami na hurangan, na pogos, na so dapot mangan, panangkarnangkar, na sopot so marama so marina, na mabalu, ro di sude angka na gale di sipanganon dohot siinumon. Songon posoposo na uasan di susu na tama marpungu hami nuaeng tu joloM: huundukhon hami ro tu toru ni tanganMu na gogo i. Sai pasupasu ma nasida nang hami asa masiurupan di angka na hurangan,

R   :  Tuhanhu jala Debatangku, asi ma rohaM di hami.

U   :  Diloas Ho do nuaeng hasusaan masa tu hami ala ni sorimago Covid-19 jala na holsoan do hami marningot angka dongannami na marsahit dohot angka na agoan hosa, partinaonan ni angka paramedis, panggomgominami, nang huriaM na so boi marminggu dope di gareja, ro di angka naposoM di di ape mangula.  Songon posoposo na uasan di susu na tama marpungu hami nuaeng tu joloM: huundukhon hami ro tu toru ni tanganMu na gogo i: Urupi ma panggomgominami, urupi ma masyarakat, urupi ma huriaM di Indonesia nang di portibi on, asa marsada ni roha, masiurupan dohot masitoguan laho mangotapi sorimago Covid-19 on,

R   :  Ale Tuhannami jala Debatanami, sai pasada ma hami jala sesa ma dosanami.

U   :  Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho; ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, Sipangolu hami. Amen.

R   :  (Mangendehon): BE No. 733: 1 “Dulo Ma Au On O Tuhan”

v  Dulo ma au on o Tuhan, bege anggukhon.

Ro do Ho tu angka dongan, topot nang au on.

Jesus Tuhan bege anggukhon,

Ro do Ho tu angka dongan, topot nang au on.

U   : Bagabaga ni Debata : Satongkin do Hutadingkon ho, alai papungupunguonHu ma ho muse marhitehite angka asi ni roha godang! Tagan di parpiar ni murukHu Hutabunihon bohingKu satongkin maradophon ho, alai marhitehite dengganbasa salelenglelengna asianHu ho, ninna Jahowa Sipalua ho. (Jes. 54: 7, 8).  Hasangapon ma di Debata na di ginjang.

R   :  Amen.

8.        Marende BE No. 434: 2 “Tuhan Jesus Bereng Au”  

v  Mago au dibaen portibi on, daging, tondi dohot rohangkon.

Holan Jesus paluaohon saluhut na tinaluhon.

Gok do au nuaeng di Tuhanhi, sirang ahu sian dosangki.

Lam jonok tu Ho ale Tuhan, sai taiti au.

Sae dosangku dibaen Tuhanhi, monang au dibaen MudarNa i.

Gogo do dilehon Tuhanhi di au, di au.

9.        E p i s t e l:

U   : Hata ni Debata turpuk di minggu Quasimodogeniti sadari on, ima na tarsurat di  1 Petrus 2 : 1 – 5. Antong, bolonghon hamu ma nasa hajahaton dohot nasa angkal dohot pangiburuon nang panihaion.

R   :  Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon,

U   :  molo tung naung didai hamu habasaron ni Tuhan i.

R   :  Ai nunga didapothon hamu Ibana na songon batu na mangolu na binolonghon ni jolma; alai na pinillit jala na arga ia di Debata.

U   :  Sai olo ma nang hamu paulion songon angka batu na mangolu, gabe bagas partondion jala hamalimon na badia, laho mamboan angka pelean partondion halomoan ni roha ni Debata marhitehite Jesus Kristus. Ima sahatna. Martua ma angka na tumangihon Hata ni Debata jala na umpeopsa. Amen.

10.  Marende BE No. 711: 1 “Songon Ursa Na Binuru”

v  Songon ursa na binuru mauas di aek tabar i.

Songon i do au mangido naeng donok tu Tuhanhi.

Holan Ho Debatangki do huhauashon i.

Ai andigan idaonhu bohiMi ale Tuhanhu.

11.  MANGHATINDANGHON HAPORSEAON:

U   :  Tahatindangkon ma haporseaonta i, songon na hinatindangkon ni donganta sahaporseaon di sandok portibion. Rap ma hita mandok:

R   :  Ahu Porsea…..

12.  Marende BE No. 755: 1 “Haposan Ho Tuhan”

v  Haposan Ho Tuhan, hot do holongMu,

di las ni roha, tingki arsak pe.

Asi ni rohaMi nang pambaenanMu,

Ho Sipalua pangondingan pe.

Haposan Ho Tuhan, haposan Ho Tuhan,

ndang na mansohot asi ni rohaM.

Nasa na ringkot di au di parade,

tung ala ni asiM do i sude.

13.  TANGIANG PANGONDIANON:

14.  Marende BE No. 826: 2 “Gohi Au Tuhan”

v  Gohi au Tuhan marhite HataMi,

gohi au Tuhan marhite HataMi.

Na mauas do tondinghu, o Tuhan di HataMi,

gohi au Tuhan marhite HataMi.

15.  JAMITA:

“MAUAS DO TONDINGKU TU DEBATA”

(Psalmen 42: 1 – 6)

Di dia do Debatam? I do sungkunsungkun na jotjot ro molo masa parungkilon na so boi paujungon di ngolu ni jolma. Halak na porsea diunjuni do laho patuduhon huaso ni Debata laho paujunghon parungkilon i, hape parungkilon i mansai maol jala ndang boi dipaujung jolma i sandiri. Sungkunsungkun i boi ro sian angka na so porsea, alai laos boi do ro sian angka na porsea i sandiri, Di dia do Debatam? Hita angka na porsea na marsitutu marsigantung tu Tuhan i, ndang mangalehon ngolunta hibul tu parungkilon i sandiri, songon na masa nuaeng na taadopi, di tingki Covid-19 ro tu sandok portibi on. Taboto do ia Covid-19 on nunga di duru ni huasonta laho mangadopi i. Laos marhite i do lam taantusi, ndang sude boi dibagasan huasonta.

Di tingki na mangadopi na masa on,  hita angka na porsea hibul ma marsigantung tu Debata songon na jinouhon ni minggunta on, Quasimodogeniti, songon posoposo na imbaru tubu, na marsigantung tu inana na patarushon ibana. Parpsalmen on manggombarhon “Songon panghalungunhonon ni ursa di angka guluan, songon i do panghalungunhonon ni tondingku tu Ho, ale Debata. Mauas do tondingku di Debata, di Debata na mangolu i, andigan pe tolhas ahu, asa huida bohi ni Debata?” Panghalungunhonon ni na porsea i lam bagas naeng marnida bohi ni Debata. Hibul ma rohanta marsigantung di Debata, songon posoposo na marsigantung tu inana, na so tuk dope mambahen manang aha sian dirina. Maus jala masihol di pangurupion ni Debata parholong roha i.

Sihol ni roha ni angka na porsea i, dipapatar marhite iluiluna arian dohot borngin, marungkil dibagasan tangiang dohot ende. Joujou dohot anggukangguk lungun ni roha, anggiat dihalomohon Debata jala lomo rohaNa papatarhon huasoNa dibagasan ngolunta angka na porsea di Ibana. Parsitutuon ni hita angka na porsea boi taendehon dibagasan serep ni roha nang iluilunta tu Debata, holan tu Debata sambing. Dihalomohon Debata do halak partigor na bojok marroha.

Halak na porsea, na use dihilala rohana dibagasan marningot hinauli ni uduran ni na torop manopot Debata, huhut marsoara olopolop dohot pujipujian. Masihol bongot tu bagas ni Debata mambahen rohanta tarihot tu Debata sandiri. Sihol ni roha i pahehehon roha na marsaor rap dohot angka na porsea i. Dibagasan sihol dohot roha na ingot tu di bagas ni Debata, hita papatuhon dirinta tu huaso ni Debata na bongot tu bagasan ngolunta. Debata bongot tu bagasan dirinta, songon i nang di bagasan diri ni angka donganta sahaporseaon. Debata naung gabe daging dibagasan diri ni Jesus Kristus, naung mate ala ni dosanta, naung tartanom jala naung mulak mangolu di ari patoluhon, laho pahehehon hita sian hamatean, mamboan hita tu parsaoran di ngolu na so ra suda raphon Debata Ama. On ma sihol ni rohanta asa taida bohi ni Debata na mangolu i. Ngolunta na masihol marnida Debata, jala Debata bongot tu dirinta, i ma gabe hagogoonta mangadopi nasa parungkilon dohot sitaonon na masa nuaeng di portibi on.

Hita angka na porsea hibul pasahathon dirinta tu Debata, manghasiholi jala manghalungunhon lomo ni rohaNa sambing manjadi dibagasan ngolunta tingki sonang manang susa, tingki hipas manang marsahit, tingki demak manang margalunsang. Di na songgop nuaeng mara Covid-19 tu portibi on, naeng hita pasahat dirinta tu Debata na mangalehon gogo di hita laho mangadopisa. Raphon parpsalmen i naeng ma hita manjouhon tu dirinta: “Boasa sai tungki ho, ale tondingku, jala boasa rusak ho dibagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku. Tondi na tungki jala rusak pagalehon saluhut pamatangta. Roha na bojok jala manghaposi Debata, mambahen tondi marhagogoon jala jogi mangadopi parsorion ni ngolu. Roha mauliate mamuji Debata patubuhon las ni roha dohot pir ni tondi. Jesus Kristus naung hehe i, mangalehon gogo tu hita mangadopi sitaonon ni ngolu sahat ro di na bongot hita tu parsaoran na manontong i, i ma hangoluan na so ra suda.  Tuhan Jesus menghaholongi ho. Amen

Pdt. Dr. Martongo Sitinjak

Kepala Departemen Koinonia HKBP

16.    Marende BE No. 736 : 1 – 2  “Jesus Haposanhu-2” (laos tapasahat ma Pelean I tu Huria; Pelean II tu Hatopan)

v  Jesus haposanhu unang ma pasombu,

au di hapunjungan, di na so mardongan.

Ho tongtong donganhu di pardalananku,

Jesus haposanhu unang au pasombu.

Ho tongtong donganhu di pardalananhu,

Jesus haposanhu unang au pasombu.

v  Ho sambing Rajangku, Ho do oloanhu.

NaposoM do ahu, di harajaonMu.

Sonang ma rohanghu, dung tangkas di ahu.

Ho sambing Rajangku jala oloanhu.

Sonang ma rohanghu, dung tangkas di ahu.

Ho sambing Rajangku jala oloanhu.

17.    PANGUJUNGI:

U   :  Songon posoposo na imbaru tubu, na marsigantung tu inana, jala songon panghalungunhonon ni ursa di angka guluan, songon i do panghalungunhonon ni tondinta tu Debata. Mauas do tondinta di Debata, di Debata na mangolu i. Hibul ma rohanta marsigantung di Debata. Ngolunta na masihol marnida Debata, jala Debata bongot tu dirinta, i ma gabe hagogoonta mangadopi nasa parungkilon dohot sitaonon na masa nuaeng di portibi on. Sai lomo ni rohaNa sambing manjadi dibagasan ngolunta tingki sonang manang susa, tingki hipas manang marsahit, tingki demak manang margalunsang. Di na songgop nuaeng mara Covid-19 tu portibi on, naeng hita pasahat dirinta tu Debata na mangalehon gogo di hita laho mangadopisa.

R   :  Tuhanhu jala Debatangku, Ho do hagogoonnami.

U   :  Ale Tuhan Jesus Sipalua jala Sipangolu hami, Tuhannami jala Ulunami, siihuthononnami, Ulubalang na gogo i. Sai asi ma rohaM, patogu ma haporseaonnami maniop Barita na Uli i, asa unang ganggu rohanami. Sai sungguli ma rohanami asa hehe hami sian parrohaon na buruk i ; asa tarulahon hami parange na imbaru. Sai pasupasu ma HuriaM dohot Parbarita na Uli, na mamaritahon Barita Na UliMi. Sai sungguli ma pangkirimon na mangolu di hami, asa tarapul rohanami manaon sitaonon di hasiangan on. Sai apuli ma angka na matean, na dangol, na pogos, na so marama so marina, angka na mabalu dohot angka na malungun asi ni rohaM. Amen.  

R   :  (Mangendehon) BE No. 788: 1-2 “Las Ma Rohamu Manghirim”

v  Las ma rohamu manghirim, Las ma rohamu manghirim;

Las ma rohamu manghirim, las ma rohamu manghirim.

v  Sai benget di haporsuhon, sai benget di haporsuhon;

sai benget di haporsuhon, sai benget di haporsuhon.

U   :  Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. AMEN

R   :  (Mangendehon) BE No. 204 : 2 “Ndang Tadingkononhu Ho”

v  Nasa na nilehonMi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

U   :  Ale Amanami na di banua ginajang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R   :  (Mangendehon):

         Ai Ho do nampuna harajaon dohot hagogoon ro di hasangapon saleleng ni lelengna. Amen!

U   :  Pasupasu ! (Parhalado Partohonan).

R   :  (Mangendehon) Amen, Amen, Amen.