ULAON NA HOHOM
(PARNINGOTAN DI HAMAMATE NI TUHAN JESUS)
HURIA KRISTEN BATAK PROTESTAN
HKBP DISTRIK XVII INDONESIA BAGIAN TIMUR
Jumat,
10 April
20
20
I. ULAON NAHOHOM Pdt= Pendeta H=Huria
1. MARENDE BE.821 : 1 - 2 RAP MA HITA ALE TUHAN
Rap ma hita ale Tuhan, ai nunga bot mata ni ari,
Holom hohom jala lungunan molo so Ho be donganhi
Togihon au tu parmianan inganan na sun denggan i
Ai tano on gok parungkilon di surgo sonang rohangki
Togihon au tu parmianan inganan na sun denggan i
Ai tano on gok parungkilon di surgo sonang rohangki
Rap ma hita ale Tuhan, ai nunga bot mata ni ari,
Sai Ho ma dongan sauduran ro di ujung ni ajalhi.
Ai nang ngangang angka tanoman dang be mabiar au di si,
di ari i ingkon sunggulan, na modom diudean i.
Ai nang ngangang angka tanoman dang be mabiar au di si,
di ari i ingkon sunggulan, na modom diudean i.
2. VOTUM
Pdt: Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia. Amen
Na tama do biru-biru i manjalo hagogon, hamoraon, hapistaran, sahala, hamauliateon, hasangapon dohot pujian.
Martangiang ma hita : Ale Amanami jala Debata nami, parasiroha nasumurung do Ho di sude jolma manisia. Nunga dilehon Ho anakMu, Tuhan Jesus Kristus Tuhan nami, manaon haleaon dohot siak ni bagi, pola mate tarsilang, asa malua hami sian gomgoman ni sibolis, Sai parrohai ma hami mamingkiri panaonon ni AnakMu, asa maruli hami marhite sian i di hasesaan ni dosa dohot haluaon sian hametean paduahalihon. Asa dapot hami hangoluan salelenglelengna marhitehite Tuhan Jesus Kristis Tuhannami, anak haholongan ni rohaM. Amen
3. PITU PARHATAAN NI JESUS UJU TARPAJAL
Pdt : Bege ma nunga mangkuling Jesus, on do hataNa sian silang i:
“Ale Amang, marpamuati ma rohaM mida nasida, ai ndang diboto nasida na binahennasida i.” (1)
Ndang dao Debata sian Ibana. Songon panghataion ni na paadopadop bohi do soara ni Jesus, didok ma: “Ale Amang, marpamuati ma rohaM...” Nda na haruar sian mata mual holong ni roha do i? Ise ma na tuk mandok songon i? Halak na mangalasahi Ibana, na manilangkon i, diondihon dope jala diparamothon. Aut ahu songon i, Tuhan, nunga dohononku: “Ale Amang sai luluhon ma pambahenannasida i tu ahu.” Dohononku ma: “Ale Debata parbadahon ma badangku.” Hape anggo tung Ho, gok holong do. Haholongon na badia sian Tuhan Jesus i, sai songgopi sai bongoti roha dohot tondingku.
Ai ndang diboto nasida na binahennasida i. Aha be nian na so diboto sintua ni malim i, alai dipalua so diboto be do. Hape agan pe songon i, ndang na marnamontok holong ni roha ni Tuhan Jesus. Ai bidang pe tao, umbidang do holongNa i; bagas pe laut, umbagas do holongNa i; timbo pe langit, tumimbo do holongNa i.
H: (mangendehon BE 212: 1 “Haholongan na Badia”
Haholongon na badia sian Jesus Tuhan i
Sai songgopi, sai bongoti roha dohot tondingki
Pdt : “Situtu do hatangKon tu ho, sadarion do ho rap dohot Ahu di Paradeiso.” (2)
Tu parjahat na di siamunNa i do nian hata on. Alai tu ho dohot tu ahu do deba pangonaina.
Nda hata sipangalambohi tondi do i? Aut datu ahu, dohononhu ma, sideangpangulonan ma i, lapatanna pangalapan hosa loja. Sian dia ma tagamon boi puas hata si songon i? Holan sian mata mual haluaon i do i. Ndang olo mansohot mual hangoluan i mamaorhon pasupasu tu na paubahon rohana. Agan pe di tano on tarbege soaraNa, alai anggo isina, nunga di Paradeiso, ido umbahen didok: “Sadarion do ho ho rap dohot Ahu di Paradeiso.” Agan pe di hau i dope ho gaunggaung ale parjahat, alai ala dipauba ho roham, alani i nunga tubu haum di Paradeiso ni Debata. Sonangna i ho, nda patut ma endehononmu nian: “Sonang di lambung Jesus, sonang na ro tusi. Unang be Ho mabiar laho mandapothon i. Tongtong dijouhon Jesus, sai ro ma ho tu Ahu, tadinghon haholomon jala haposi Ahu.”
H: (mangendehon BE 214: 1 ”Sonang di Lambung Jesus”)
Sonang di lambung Jesus, sonang na ro tusi
Unang be ho mabiar lao mandapothon i
Tongtong dijouhon Jesus: “Sai ro ma ho tu au
Tadinghon haholomon jala haposi au”
Sonang di lambung Jesus, sonang na ro tusi
Unang be ho mabiar lao mandapothon i
Pdt : “Ndi ma inang anakmi, ndi ma inangmi.” (3)
Ndang dipalingkang inaNa si Maria i antong tampuk ni pusupusuna naung gantung di silang i. Dipamanat Jesus do i, didok ma: “Ndi ma inang anakmi.”
Nda jamita parsaoran na rongking do i? Asa marpartalian hasadaon ganup na porsea di Ibana, nirahut ni silang i. Nunga mandaodao jongjong angka na mananda Jesus i, songon i muse nang angka parompuan na mangihuthon Ibana sian Galilea. Beha ma tahe, ndada tiala roha, ai gari si Petrus i pe, pola do dipambura-burahon dirina paboa na so ditanda Jesus i. Masihaishon api sian gurung-gurungna do ninna rohana be. Alai, ianggo si Maria inaNa i, rap dohot paribanna dohot si Maria ni si Kleopas dohot si Maria Magdalena, jongjong do di lambung Jesus na di silang i. Ndang tarpabereng-bereng Jesus be ina pangintubuna i, songon i muse nang inaNa si Maria, ndang tarpaida-idasa be anak sinuanbeuna i.
Disi dilibashon soldaodu i lasaklasakna i tu Jesus, disi do songon na ditutuphon ulosna i tu simajujungna unang dipaidaida i. Holan disi dipadonok soldadu i tu Jesus anakna i, nunga marlobok tarontokna i mandok: “Aha ma tagamon na naeng bahenonna?” Ia dompon ma roham inang aut adong anakmu na songon sagak ni panabian laho ne tu toru ni situmandok, nda ingkon maheu do paidaidahonsa? Ndang tarurupi si Maria be, holan iluna i nama diporo pola hira na mahiang pariluiluanna. Mamereng i ma Jesus, gabe marsoara mandok: “Ndi ma inang anakmi, pos ma roham, pir ma tondim.”
H: (mangendehon BE 77:1 “Hamu Saluhut Halak”)
Hamu saluhut halak, ro ma hamu manatap. Hangoluanmu on.
Na gantung di parsilang tumahan hamatean.
Naeng ingotonmu i tongtong
P dt : “Mauas Ahu.” (4)
Di jolo ni on dilehon do nian siinumon, alai ndang dijalo, hape nuaeng nunga dipangido. Nda saut do songon na tarsurat di Padan na Robi hian taringot tu Ibana di na nidok ni par-Psalmen i “Merus do gogongku songon ngar-ngar jala lohot do dilangku di langit-langit ni pamanganhu jala tu orbuk ni hamatean dipapodom Ho au.” Jesus mual hangoluan ni boru Samaria i, nuaeng gabe mauas. Songon na dipurun dihilala, mamiltak mataniari, mangontahi ma bugang i, lam sidung mudarna mardurusan sian bugang i. Modar ma dihilala. Songon na sungkot nama dihilala sialapiangkauNa.
Alani mohopna gabe dijouhon Jesus ma: “Mauas Ahu.” Asa saut do sombu uashu ia mauas pe Jesus i. Ndang pola be dohot au muse manjouhon di ujung ni langkangku “Mauas ahu.” Tutu godang do na huhauashon di portibi na mangilas on, alai nuang gabe sombu ma sudena i ala naung diporsan Jesus di dilangNa huhut mandok “Mauas Ahu.”
H: (mangendehon BE 8 4 : 1 “Aut na Ginorga tu Rohangku”)
Aut na ginorga tu rohangku, bohiM di na lao mate Ho
Aut na huingot o Tuhanhu, tongtong panghophopMi di au
Ai Ho do paluahon ahu, dosangku do pinorsanmi
Didaoni Ho parsahitonhu, martua au binahen nii
P dt : “Eloi, Eloi Lama Sabakhtani.” (5)
Ale Debatangku, Debatangku, boasa tung tadingkononMu ahu? Nunga songon halak-halak na tarpunjung, songon tandiang na hapuloan Jesus di silang i. Dibereng humaliang, holan Ibana nama na punjung di hau i. Tu dia ho ale angka sisean na sai rap dohot Ibana nasailaonna i? Nunga tudia ho ale Petrus? Nda didiok ho do na so tupa tadinghononmu Ibana? Nunga tudia ho ale Lazarus? Nunga tudia ho ale angka na bosur siala roti sisaotik na sian Jesuski? Tudia ho ale manisia?
Diida ma tu ginjang, songon na di patait Debata BohiNa. Dungi mangangguk badar ma Ibana. Angguk badar na badia do on mandok: “Eloi, Eloi Lamasabakhtani; Ale Debatangku, Debatangku, boasa tung tadinghononmu Ahu?” Ndada na mamurai, ndada na mandele manang mamulasi Jesus di anggukNa i. Asa tung paltak do tahilala bagas ni panghaholongi ni Debata di panghophopNa i di hita, ai songon i ma bernit ni sitaonon i ala ni dosanta. Alani i angka dotdot ma ho ale tondingku, angka hitir ma ho umbege angguk badar na badia i, ai ho hian do tama manganggukhon i alani hajahatonmu, hape nunga dijoloani Anak ni Joma i manganggukhonsa.
H: (mangendehon BE 78:1 “O Ulu na Sap Mudar”)
O Ulu na sap mudar binaen ni bugangMi
Na sian janggar-janggar, sisungsang duri i
O Ulu hatongamon hian do tumpalMi
Ditaon Ho haleaon, Ho naeng sombaonhi
P dt : “Ale Amang, tu bagasan tanganMu ma hupasahat tondingKu.” (6)
Jesus na burju marama i, Jesus Anak sipangoloi i, ndang dung manghalupahon AmaNa na di surgo i. Sian mula ni ulaonNa sahat ro di ujung ni ngoluNa, sai tong do ngolu na marpandapotan tu AmaNa i. Nuaeng pe, ndang tu hamatean i diodothon tondiNa i. Ndang lupa Ibana pasahathon arta na ummarga i tu AmaNa. Di pagomgomhon do tu AmaNa na di surgo i tondiNa i, didok ma: “Ale Amang, tu bagasan tanganMu ma hupasahat tondingKu.” O hamu huria ni halak Kristen na badia, nunga dijoloani Anak ni Debata soaram manjouhon asa diingot ho pagomgomhon ngolum dohot tondim tu tangan ni Amanta na di surgo i. Sintong do molo taparhatopot marhite ende ni angka na porsea i”:
H : (mangendehon BE 383 “Adong do Ama na di Surgo i”)
Adong do Ama na di surgo i, Tuhan Jahowa Debatanta i
Dijou do au na lao ma au tu Ama na di surgo i
Lao ma au, lao ma au tu na di surgo i
Lao ma au, lao ma au tu na di surgo i
Dijou do au na lao ma au tu Ama na di surgo i
Pdt: “Nunga marujung.” (7)
Aha do na marujung? Nunga marujung angka ulaon dohot paraloanNa i. Nunga marujung nang silangNa i. Nunga marujung sitaononNa i. Andorang so dipaunduk dope simanjujungNa i, nunga mulai mandele mataniari i marsinondang gabe mangholom ma sandok tano on.
Ndang tarpaidaida mataniari i be Tuhanki na sai gantung i. Songon na maila mataniari i marnida bohi ni na sai marsinondang nasailaon. Disonggak sinondang ni asi ni roha ni Jesus i do sinondang ni mataniari i, ujungna gabe dipaholom mataniari ma dirina. Molo adong sian hamuna ale jolma manisia parhipastaran portibion mandok: “gerhana ni matniari do i” – uji ma paresohon tu tingkina manang na pas do i? Jempek do alus tusi mandok, ndang. Molo adong dope sian ho ale portibi ma mangilas mandok: “timus ni dolok marapi na mapultak do i, tangihon ma parpandebisuk mandok, ndang. Antong aha do i? Mangholom mataniari, gabe mangholom ma sandok tano on. Gabe songon na alang so tarida nama Tuhanta i di silang i. Ale mataniari boasa so manghidop be ho? Tagamon naung ditatap ho do na so manghidop be simalolong ni Tuhanhi? Nunga mamirong humaliang. Disi ma dipagogo, dipangiar Jesus soarana mandok: “Nunga marujung.” Jadi tos ma hosaNa.
--- Manghuling ma giringgiring 7 hali lambat-lambat, jongjong ma sude di bagasan hahohomon martangiang. Di na huhut manghuling giringgiring, dipalu ma poti marende mansai angonangon (BE 88). Dung sidung manghuling si 7 hali i, laos mulai ma dipagogo soara ni potimarende, huhut laos tingki jongjong dope sude, rap ma mangendehon BE 88---
H: (Mangendehon BE 88 : 1 - 2 “Jesushu Naung Manobus Au”)
Jesushu naung manobus ahu sai naeng haholonganhu Ho
Tu Dolok Golgata Ho laho nionjar ni holongMu do
Hupuji nasa asiMi, alai gumodang holongMi
Tarsolsol bagi do rohangku paidaida dangolMi
Marningot sasude dosangku ai ido na tinaonMi
Hupuji nasa asiMi, alai gumodang holongMi
Pdt: Nunga tos hosa ni Jesus i. Nunga marujung be dibahen Ho ale Tuhan. Alai ida ma, nunga laos godang na jumolo borhat mangihuthon Ho sian bagas ni halak Kristen di portibi on. Sian ruas ni huria on pe nunga torop na laho mandapothon Ho. Beha, nunga rap ho ale haholongan dohot Jesusmi naung jumolo borhat sian ho? Aha do labangku sian hamamateM i ale Jesusku? Aha ma upangku sian pandang-haroburonMi ale Tuhanku? Ingot ari hamamatem ninna angka na porsea na parjolo i. Pasolhot ma hamamatem amang-inang tu hamamate ni Jesus i. Ia hamamateM ale Jesus, gabe hamamate ni hamateanhu do i hape. Ia hamamateM ale Jesus, gabe pintu hamasuhanku do i tu surgo hasonangan i. Ai marhite i do diparade Ho inganan na sonang i. Ianggo Letnan ni soldadu na manjaga pamajalan i, gabe dipuji do Debata, ninna do: “Tutu do halak on na tigor roha.” Jadi sude natorop i na marluhut mainondur, masitompuk andorana be do marnida na masa i laos mulak ma.
Tama manghorhon las ni roha do di hita hamamate ni Jesus on, ai diungkap do di hita dalan tu haheheon sian hamamatenta dohot sian hinambor ni naung jumolo monding sioan hita pe. Nuaeng pe patut ma hita manompuk andoranta be laos mangendehon, alani i jongjong ma hita saluhutna!
H: (mangendehon BE 449 : 1 - 2 “ Sai Solhot Tu silangmi ” )
Sai solhot tu silangMi Jesus ingananhu
Mual na mabaor disi, i ma inumonhu
SilangMi, Tuhanhi, i ma pujionhu
Paima sogot sahat au, i endehononhu
Lao ma au tu silangMi, i haporusanhu
Sai asi ma rohaMi, unang tulak ahu
SilangMi, Tuhanhi, i ma pujionhu
Paima sogot sahat au, i endehononhu
4). TANGIANG ALE AMANAMI...PASUPASU...AMEN 3 x
P: Rap mandok ma hita di tangiang hatopanta i.
H: Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!
Ai Ho do nampuna harajaon dohot hagogoon ro di hasangapon saleleng ni leleng. Amen !
P: Asi ni roha ni Tuhanta Jesus Kristus; dohot Holong ni roha ni Debata Ama; dohot Parsaoran ni Tondi Parbadia, i ma na mandongani hamu saluhutna.
H: (mangendehon) Amen…Amen…Amen !
TUHAN YESUS MEMBERKATI !!!
No comments:
Post a Comment